Стручни екипи од Центарот за јавно здравје, во соработка со Град Скопје и Општина Карпош, спроведоа дополнителна теренска дезинсекција против комарци и нивните ларви.
Акцијата се реализираше во текот на ноќта на неколку критични точки во општината, каде што е забележано зголемено присуство на инсекти. Дезинсекцијата опфати локации на улицата Ловќенска 4 во населбата Козле и на улицата Скупи 8 во Бардовци.
Од надлежните служби информираат дека досега се реализирани седум теренски прскања на подрачјето на Скопје и Општина Карпош, со посебен фокус на местата каде што има поголема концентрација на комарци.
Активностите се спроведуваат како дел од мерките за намалување на бројот на комарци и превенција од заболувања што може да ги пренесуваат овие инсекти, вклучително и западнонилската треска.
Општина Карпош најавува продолжување на координираните акции за дезинсекција со цел намалување на присуството на комарци и поголема заштита на граѓаните.