Хроника

Пиштол и седум куршуми откриени кај совозач во службено возило на ЈП „Комунална хигиена“ – Скопје

Пиштол со седум куршуми бил пронајден кај совозач во службено возило на ЈП „Комунална хигиена“ – Скопје, при полициска контрола на булеварот „Гоце Делчев“. Едно лице е лишено од слобода, а за случајот е известен јавен обвинител, велат од Министерството за внатрешни работи, објави „Скопје 1.мк“

Натаму порталот наведува: Според МВР, полициската акција била спроведена на 19 ноември 2026 година, во 21:15 часот, откако службеници од Единицата за недозволена трговија при СВР Скопје добиле претходни сознанија и презеле мерки. На булеварот „Гоце Делчев“ била запрена „дачија“ со скопски регистарски ознаки, сопственост на ЈП „Комунална хигиена“ – Скопје. Возилото го управувал 34-годишниот Д.Д. од Скопје, додека на совозачкото седиште бил 52-годишниот Љ.Б., исто така од Скопје.

При извршениот преглед на лицата и возилото, полицијата кај совозачот пронашла пиштол „Црвена Застава“, калибар 7,65 милиметри, со рамка во која имало седум куршуми од истиот калибар. „Притоа, бил извршен преглед на лицата и возилото и кај лицето Љ.Б. бил пронајден еден пиштол ‘Црвена Застава’ кал.7,65 мм со една рамка со седум куршуми кал.7.65 мм. Лицето е лишено од слобода и задржано во Полициска станица Гази Баба. Известен е јавен обвинител и по целосно документирање на случајот ќе следува соодветна пријава“, соопштија од МВР.

Од Министерството засега не прецизираат дали за оружјето постоела дозвола, ниту во какви околности совозачот го носел пиштолот во возилото на јавното претпријатие. Во истиот одговор МВР се осврнува и на објави на социјалните мрежи поврзани со случувања во „Комунална хигиена“.

Оттаму посочуваат дека во СВР Скопје нема пријава за случајот опишан во тие објави, туку дека на 16 ноември било пријавено недоразбирање и вулгарно однесување преку телефон меѓу раководно лице во претпријатието и еден вработен, поврзано со работните обврски. „Во врска со објавите во дел од социјалните мрежи ве известуваме дека во СВР Скопје нема пријава за таков случај, туку на 16.11.2026 во СВР Скопје има пријава за недоразбирање и вулгарно однесување преку телефонски уред помеѓу раководно лице во ЈП Комунална хигиена и еден вработен околу работните обврски“, наведуваат од МВР.

Од полициското соопштение не произлегува дека телефонското недоразбирање и пронаоѓањето на оружјето се поврзани, ниту дека станува збор за истите лица. За пронајдениот пиштол и лишувањето од слобода на 52-годишниот совозач е известен надлежен јавен обвинител. По целосното документирање на случајот, МВР најавува поднесување соодветна пријава. објави Скопје1.мк.

Најнови вести од: Хроника

Најнови вести

To top