Иван Галевски е јунакот на Алкалоид во дербито со Еурофарм Пелистер во Битола, кое заврши нерешено 26:26 откако голманот на гостите му одбрани седмерец на десното крило Богдан Радивоевиќ по истекот на времето.
Токму младиот чувар на мрежата го инспирира големото враќање на „фармацевтите“ по водството на шампионот од 23:16, кога со серија успешни интервенции им помогна на соиграчите да ја стопат огромната негатива и да се вратат од жешкиот терен со голем бод.
Во претходната акција Иван Ѓорѓиев го искористи исклучувањето на Домен Тајник поради остриот старт врз Марко Митев и го постави конечниот резултат, пред домашниот тренер Гарабаја да побара тајмаут 20 секунди до крајот, по кој неговите ракометари го изнудија пеналот што не го реализираа.
Галевски и Марко Кизиќ запишаа вкупно 11 одбрани, две помалку од Никола Митревски на спротивната страна.
Во нападот најефикасни кај пелистерци беа Дејан Манасков со 9 гола (од 17 обиди) и капитенот Филип Кузмановски со 5, а во екипата од Автокоманда се издвоија Марко Стојковиќ со 8/9 и Ѓорѓиев со 6 погодока.
По 14 одиграни кола во Суперлигата води Вардар со максимални 28 бода, четири повеќе од Еурофарм Пелистер, а веднаш за нив Охрид и Алкалоид имаат по 21.