Германија ќе ја признае палестинската држава „на крајот од процесот“ кој значи постигање на договорено решение за две држави, изјави германскиот министер за надворешни работи Јохан Вадефул вчера, откако неколку западни земји ја признаа „Палестина“, јавуваат медиуми.
Во разговор со новинарите во Њујорк на маргините на Генералното собрание на ОН, Вадефул ја потврди позицијата на Берлин откако Обединетото Кралство, Канада, Австралија и Португалија ја признаа палестинската држава на 21 септември.
„За Германија, признавањето на палестинска држава доаѓа на крајот од процесот. Но, овој процес мора да започне сега“, рече Вадефул.
„Договорено решение за две држави е патот што може да им овозможи на Израелците и Палестинците да живеат во мир, безбедност и достоинство“, додаде тој.