На прес-конференцијата по повод првата годишнина од почетокот на неговиот втор мандат американскиот претседател се пофали со зборовите дека и „Бог е многу горд“ на неговите постапки .
На прес-конференцијата во Белата куќа, Трамп рече: „Бог е многу горд на она што го направив“, наведувајќи ги неговите достигнувања во внатрешната и надворешната политика, објави АФП.
Трамп ја истакна својата улога во последните 365 дена и неговата надворешна политика.
Запрашан дали сака неговиот нов Мировен совет да ги замени Обединетите нации, американскиот претседател Доналд Трамп рече: „Можеби“.
„ОН едноставно не беа многу корисни. Јас сум голем обожавател на потенцијалот на ОН, но никогаш не ги исполнија очекувањата“, рече Трамп за време на прес-конференцијата во Белата куќа.
„ОН требаше да ги реши сите војни што јас ги решив… [но] мислам дека треба да дозволиме ОН да продолжи да постои бидејќи нејзиниот потенцијал е огромен“, додаде тој.
САД првично го претставија Советот за мир како надзорно тело фокусирано на Газа, а во ноември Советот за безбедност на ОН гласаше да му даде мандат да работи до крајот на 2027 година.
Но, повелбата на Советот за мир, испратена до потенцијалните членови минатата недела, не ја споменува Газа и сугерира дека САД би сакале групата светски лидери да стане најважното тело за решавање на конфликти во светот.