Украинсиот претседател Володимир Зеленски изјави дека неговата земја е подготвена за вистински одлуки за постигнување мир, но во исто време нагласи дека нема да има отстапување на територии на Русија, пишува „Киев пост“.
Во објава на својата Фејсбук страница, Зеленски ја истакна решителноста на украинскиот народ.
„Украинците го бранат она што е нивно. Дури и оние што се со Русија знаат дека таа прави зло. Секако, ние нема да ја наградиме Русија за она што го стори. Украинскиот народ заслужува мир. Но, сите партнери мора да разберат што е достоинствен мир“, напиша тој.
Зеленски повтори дека војната мора да заврши, обвинувајќи ја Русија за нејзиното започнување и продолжување.
„Одговорот на украинското територијално прашање е веќе во Уставот на Украина. Никој нема и не може да отстапи од него. Украинците нема да му ја дадат својата земја на окупаторот“, рече тој.
Украинскиот лидер ја потврди подготвеноста за вистински мировни договори, но предупреди против обидите за донесување одлуки без учество на Украина.
„Сите одлуки што се против нас, сите одлуки што се без Украина, се во исто време одлуки против мирот. Тие нема да постигнат ништо. Тие се мртви одлуки; тие никогаш нема да функционираат. И на сите ни треба вистински, жив мир што луѓето ќе го почитуваат“, изјави тој.
Тој, исто така, се осврна на соработката со американскиот претседател Доналд Трамп. „Подготвени сме да работиме заедно со претседателот Трамп и сите наши партнери за вистински и, најважно, траен мир – мир што нема да се сруши по каприците на Москва“, додаде тој.
Неговата прес-служба, исто така, извести за критиките за планираната средба меѓу американскиот претседател Доналд Трамп и рускиот претседател Владимир Путин во Алјаска.
Зеленски ја нарече таа средба „многу далеку од оваа војна што се одвива на нашата земја, против нашиот народ и која не може да заврши без нас, без Украина“.
Според него, клучната грешка на Путин била потценувањето на украинскиот народ.