Адвокатот Тони Менкиноски, кому Бугарија му изрече десетгодишна забрана за влез во државата, во „Тема на денот“ на ТВ Сител за апсурдноста на неговиот случај се повика на Нирнбершкото судење по Втората светска војна.
„Да се стави црн печат на адвокат не се случува ни во Нирнбершките процеси, кога се затапувани најголемите нацисти, а камоли кога вие застапувате организација која 17 пати има добиено пртесуди во Судот во Стразбур против Бугарија за повреда на основните човекови права во оваа држава“, рече застапникот на ОМО „Илинден“-ПИРИН пред Европскиот суд за човекови права.
Тој не добил образложение зошто не му е дозволен влез кај источниот сосед на Македонија, а потегот го оцени како паничен од страна на Софија.
„Мислам дека причината е тоа што во почетокот на мај Комитетот на министри, 46 членки на Советот на Европа, ќе расправаат во врска со непочитувањето или неимплементирањето на одлуката на Европскиот суд за човекови права за Бугарија. Бугарија е во паника бидејќи може да се донесе одлука за исклучување на Бугарија од Советот на Европа поради непочитување на столбот, на главниот столб, а тоа е Судот (ЕСЧП) во Стразбур“, објасни Менкиноски.
Според адвокатот, постојат повеќе механизми за оспорување на оваа одлука на Бугарија, и тоа пред Советот на Европа и Обединетите нации, информирани се и Хјуман рајтс воч и Амнести интернешенел, а тој денеска се обратил и до сите адвокатско-конзуларни претставништва во Македонија.
На тоа дека, наводно, ја загрозува националната безбедност на Бугарија, Менкиноски одговара оти, ако е така, тогаш загрозена е и Македонија како нејзин сојузник во НАТО, што за него е апсурд.