Хрватската пратеничка и пријателка на Македонија, Маријана Петир, уште еднаш ја поддржа македонската евроинтеграција, истовремено осудувајќи ги билатералните пречки на патот кон Европската унија.
„Ми беше чест да учествувам на тркалезната маса насловена ‘Патот на Македонија кон Европската Унија и хрватското искуство’, заедно со дипломатите Владимир Дробњак и Емил Крстевски, амбасадорот Златко Крамариќ и аналитичарот Мирче Адамчевски.
Веќе 21 година Македонија чека да се оствари нејзината европска перспектива. Таа спроведе бројни реформи и се согласи на тешки компромиси – вклучително и промена на името на државата – но сепак, нејзиниот европски пат останува блокиран.
За време на мојот мандат како пратеник во Европскиот парламент, ја основав и ја предводев групата ‘Пријатели на Македонија’, залагајќи се за европскиот пат на земјата, заемното разбирање и почитувањето на македонскиот идентитет.
Европската Унија не смее да применува двојни стандарди! Билатералните прашања не треба да бидат пречка за европската интеграција, а националниот идентитет, јазикот и историјата не смеат да бидат предмет на политичко условување.
Македонија не бара посебни привилегии, туку правичен третман. Хрватска била и останува нејзин искрен пријател!“, порача Петир преку социјалните мрежи.
Тркалезната маса беше организирана од „Хрватско-македонска тангента“ и од Хрватската паневропска унија, под покровителство на Министерството за надворешни работи и надворешна трговија на Македонија.