Разликата е очигледна, од долгогодишен застој, долгови и неработење, ние денеска имаме позитивен раст, инвестиции и резултати. Ова, меѓу другото, го истакна министерот за земјоделство, шумарство и водостопанство, Цветан Трипуновски. Министерот се осврна на работењето во изминатите две години. Тој рече дека затекнале застој, институционален хаос, наталожени проблеми и нерешени предмети. Пад на производство, неплатени субвенции.
- За нашата посветена работа говорат резултати и бројки. Имаме зголемен извоз на земјоделски производи и нивни преработки од 417 милиони евра во 2025 година, суфицит од 215 милиони евра истата година. Согласно податоците на ДЗС бележиме раст и во производството. Позитивен раст од 3,3% во прв квартал 2026 година. Исплатени и зголемени субвенции, истакна министерот.
Тој потсети дека, за Министерството да биде поблиску до земјоделците, реновирани се и отворени нови подрачни единици во повеќе места. Биле реновирани шумски полициски станици.
- Во текот на 2024 и 2025 година доделивме финансиска поддршка во износ од 75.000.000 денари на научно – образовните институции за набавка на опрема за лабораториски анализи, нагласи Трипуновски.
Тој даде осврт и на зголемените откупни цени, придвижување на капиталните проекти, модернизација во земјоделството. Тој додаде дека за центарот за сортирање и складирање во Струмица се подготвува документација, со почеток на изградба во декември 2026. Реконструкција на АФПЗРР – градежните работи се веќе започнати и ќе завршат до декември 2026. Ќе се воспостави база на земјоделско земјиште и интегриран систем, следен чекор е објава на тендер по одобрување од банката.
Говореше и за мерките за подобрување на наводнувањето, споменувајќи го проектот за Страиште, завршена е предквалификацијата и изборот на фирма е при крај, за многу брзо време, вели, ќе отпочне изградбата и за системот за наводнување Пепелиште, се работи на проектот и до крајот на годината се очекува да биде избран изведувач и за овој проект.
Трипуновски зборуваше и за ИПАРД, нови повици и завршување на стари предмети. Кога станува збор за државно земјоделско земјиште, досега, рече, биле склучени над 2.100 договори за околу 6.000 хектари, ослободени над 2.000 хектари, а во најскоро време ќе имало објавување на нови јавни повици. Министерот се осврна и на успешноста во работата во делот на шумарството, ловството, рибарството.
- Изминатиот период работевме и на носење на клучни законски решенија – Закон за земјоделско земјиште, Закон за земјоделство и рурален развој, Закон за уредување на пазарите, Закон за шумите. Во постапка е формирање на кредитен револвинг фонд за откуп на земјоделски производи, подвлече Трипуновски.
Тој говореше и за кампањата ,,Македонско најдобро”.
- Ја започнавме кампањата која има за цел да се зголеми и зајакне домашното земјоделско производство, да се обезбеди просперитет на руралните средини и ја подигнеме свеста за квалитетот, автентичноста и значењето на домашните производи и преработки од истите. Нашата работа се препознава преку реални резултати. Разликата е очигледна, од долгогодишен застој, долгови и неработење, ние денеска имаме позитивен раст, инвестиции и резултати. Од нефункционален систем за наводнување, денес имаме систем што функционира и допринесува зголемен принос на земјоделски култури. Денес Македонија забрзува со инвестиции, проекти, реформи. Нема враќање назад, кон оние што донесоа афери, порази и криминал, нема враќање кон политики што ја уништуваа државата. Ние ќе продолжиме уште посилно затоа што Македонија забрзува и нема да застане, рече министерот Трипуновски.