Со првиот официјален собир и тренинг, двократниот европски ракометен шампион Вардар ги почна подготовките за новата сезона, во која по три години ќе се врати во Лигата на шампионите.
Освојувачот на двојната круна во минатата сезона си постави амбициозна цел да стигне што подалеку во ЛШ и во Регионалната лига и да ги одбрани трофеите во Суперлигата и во Купот на Македонија.
За тоа треба да помогнат засилувањата од странство – десниот бек Мохаб Абделхак, голманот Милан Бомаштар, левиот бек Леон Љевар и средниот бек Матео Фадуил, а со првиот тим тренираат и кадетските репрезентативци Бобан Поповски и Марко Ѓорчески, како и средниот бек Никола Начовски од младинскиот состав.
Првиот дел од подготовките ќе се реализира во Скопје, а планиран е и престој во Маврово, каде екипата ќе работи на физичката подготовка и на воигрување.
Увертира на стартот во Регионалната лига ќе бидат турнирите во Струга и во Охрид.
Лигата на шампионите стартува на 9 септември, а составот на Иван Чупиќ во групата Б за противници ги има Нант, Мелзунген и Висла Плоцк.