Развојот на обновливите извори на енергија во Македонија ја надминал динамиката предвидена со Националниот план за енергија и клима (НПЕК), а напредокот во спроведувањето на преземените обврски позитивно е оценет од Енергетската заедница.
Министерството за енергетика, рударство и минерални суровини навреме го доставило до Енергетската заедница Извештајот за напредокот во спроведувањето на НПЕК. Навременото известување, според Министерството, потврдува дека обврските преземени со планот се спроведуваат континуирано и дека се работи на унапредување на националната енергетска и климатска политика.
Во последниот „Извештај за оценка на усвоените национални планови за енергија и клима 2025–2030 и напредокот во 2025 година кон енергетските и климатските цели во Енергетската заедница“ позитивно се оценети напредокот на Македонија и исполнувањето на преземените обврски.
Обновливите извори имаат централно место во енергетската транзиција, при што учеството на чистата енергија во производството на електрична енергија забрзано расте. Особено е изразен развојот на фотонапонските и хидроенергетските капацитети.
Според резултатите, инсталираниот капацитет на електроцентралите од обновливи извори веќе ја надминал националната цел и индикативната траекторија утврдена со НПЕК.
Планот предвидува до 2030 година обновливите извори да учествуваат со 38 отсто во бруто финалната потрошувачка на енергија. Предвиден е растечки тренд во трите клучни сектори – производството на електрична енергија, греењето и ладењето и транспортот.
Националните цели за обновлива енергија се усогласени со рамките на Енергетската заедница и ги исполнуваат минималните барања во сите четири категории опфатени со НПЕК.
Од Министерството посочуваат дека продолжуваат со креирање и спроведување политики и мерки за поттикнување на инвестициите во обновливи извори, подобрување на регулаторната рамка и забрзување на декарбонизацијата.
Во следниот период како приоритети се наведуваат намалувањето на примарната потрошувачка на енергија, развојот на обновливите извори и подобрувањето на енергетската ефикасност, паралелно со зајакнувањето на внатрешниот енергетски пазар.
Во тој процес значајно место имаат пазарното поврзување, активното учество на потрошувачите, сопственото производство и потрошувачка на електрична енергија, енергетските заедници, системите за складирање енергија и воведувањето паметни мерни системи.
Министерството оценува дека со овие активности енергетскиот сектор се насочува кон поголема сигурност во снабдувањето, зголемено домашно производство од обновливи извори и поефикасен и современ енергетски систем, во согласност со националните цели и европските стандарди.