Хотелско-угостителскиот сектор речиси една деценија бара повластена даночна стапка – намалување на ДДВ-то за поконкурентни и поевтини услуги. Дел од барањата што се очекува да се разгледуваат во новоформираниот Совет за туризам се и субвенционирање на вработените, со цел да се спречи отпуштање и да се зачува работната сила, пренесе МРТ. Сезонските осцилации го прават овој сектор исклучително ранлив, поради што е неопходна системска државна поддршка.
- „Охридско-струшкиот регион е сезонски туризам и нормално се соочуваме со проблеми околу чувањето на вработените 12 месеци. Каде што да беше побарано и уште бараме некаква субвенција на вработените, барем еден дел од неколку месеци во таа најниска сезона да не правиме големи загуби“, вели Крсте Блажески, претседател на ХОТАМ.
Научната фела со поинаков став – велат треба да се преиспита оправданоста на барањата, да се издигне квалитетот на услугите и да се развива претприемачкиот дух.
- „Само бараат … секој бара помош, и треба ако има одредена оправданост за таа помош да ја добиеме. Но на крајот не смееме да дозволиме тоа да прерасне во еден должничко-доверителски однос, да дојде до степен на паразитизам, бидејќи од 2010 па до денес нашиот туризам се базира на субвенционирање“, вели Климент Наумов, професор на ФТУ Охрид.
Економските предизвици со кои се соочува хотелско-угостителската индустрија, во услови на сезонско работење, нестабилен прилив и раст на трошоците и платите, според ХОТАМ јасно укажуваат дека без соодветна државна поддршка одржливоста е сериозен предизвик.