Управата за јавни приходи ги засилува контролите во угостителството пред празниците, откако бројките покажаа дека неиздавањето фискални сметки и понатаму е масовна појава. Од почетокот на годината до крајот на ноември спроведени се околу 4.000 контроли, а секоја четврта завршува со констатирана неправилност во делот на фискализацијата. Од УЈП информираат дека пред да почнат со построг режим на казни биле направени околу 3.500 советодавни посети на терен. При тие посети биле откриени нефункционални или неправилно регистрирани фискални апарати, непријавен дневен промет и неводење соодветни финансиски извештаи.
Анализите на податоците од ГПРС-системите, теренските контроли и ДДВ-пријавите покажале ризични обрасци кај дел од даночните обврзници – исклучително ниски или идентични дневни промети, несогласувања меѓу фискалните уреди и пријавениот ДДВ, како и големи разлики меѓу капацитетот на локалот и пријавениот промет. Според УЈП, тоа е јасен сигнал дека дел од готовинскиот промет воопшто не се евидентира.
Резултатите од контролите се веќе мерливи: изречени се над 2.500 казни, а 113 угостителски и други објекти се запечатени поради сериозни прекршувања на даночните правила. На дел од даночните обврзници им е изречена и забрана за вршење дејност.
- „Фактот дека секоја четврта контрола завршува со утврдена неправилност во делот на неиздавање фискални сметки укажува на широка појава на неевидентирање на готовинскиот промет“, порачуваат од Управата.
Покрај неиздавање сметки, инспекторите утврдиле и неуплаќање на дневниот промет во банка, како и неводење книга на дневни финансиски извештаи, иако тоа е законска обврска.
УЈП апелира до граѓаните да бараат фискална сметка за секоја услуга и секое кафе платено во локал, потсетувајќи дека токму фискалната сметка е гаранција дека прометот е евидентиран. Од Управата предупредуваат дека непочитувањето на правилата ја храни сивата економија и директно го оштетува државниот буџет – пари што потоа недостигаат за здравство, образование и други јавни услуги.
Во пресрет на празничната сезона, кога прометот во угостителството традиционално расте, УЈП најавува продолжување и заострување на контролите, особено во објектите со висок и нередовно пријавен промет. Порaката до стопанството е дека „советодавниот период“ завршил, а оние што и понатаму ќе избегнуваат да издаваат фискални сметки ќе се соочат со високи казни и затворање на локалите.