Србија ќе ја врати задолжителната воена служба од март следната година, соопшти српскиот претседател Александар Вучиќ.
Според најавата, воената обука ќе трае 75 дена и ќе ги опфати мажите помлади од 30 години. Вучиќ ја оцени обуката како „многу кратка“, но неопходна за зголемување на одбранбената подготвеност на земјата.
Најавата беше дадена на воениот аеродром Батајница кај Белград, каде што беше организирана голема презентација на воена опрема, вклучувајќи модерни авиони, хеликоптери, ракетни системи и друго вооружување.
Претседателот Вучиќ истакна дека пред почетокот на регрутацијата ќе бидат спроведени потребните административни и логистички подготовки.
Србија ја укина задолжителната воена служба во 2011 година, кога целосно премина на професионална армија. Сегашната одлука доаѓа во услови на зголемени безбедносни предизвици во Европа, поради што повеќе држави ги преиспитуваат своите одбранбени политики.
Слични размислувања се водат и во Германија, каде што се разгледува можност за повторно воведување на задолжителна воена служба доколку не се исполнат целите за доброволно регрутирање.
Германскиот канцелар Фридрих Мерц неодамна најави амбициозни планови за зајакнување на Бундесверот, со цел бројот на активни војници да достигне 260.000 до 2035 година.