Американскиот претседател Доналд Трамп изјави дека не се согласува со британскиот премиер Кир Стармер за признавањето на палестинска држава.
Запрашан на прес-конференција за признавањето на палестинска држава, Трамп рече дека „не се согласува со премиерот за тоа“, додавајќи дека тоа е „всушност едно од нашите ретки несогласувања“.
Стармер рече дека тој и Трамп се согласуваат за крајната цел, а тоа е мир во регионот. „Апсолутно се согласуваме за потребата од мир и водство бидејќи ситуацијата во Газа е неподнослива“, рече тој.
Британскиот премиер беше прашан од новинарите дали чека Трамп да ја напушти земјата пред формално да признае палестинска држава овој викенд.
„Јасно го искажав мојот став на крајот на јули за времето на признавањето, што нема никаква врска со оваа државна посета“, одговори тој.
„Разговарав со американскиот претседател за тоа, како што би очекувале помеѓу двајца лидери кои се почитуваат и сакаат едни со други и сакаат да постигнат подобро решение на најдобар можен начин“, додаде тој.
Вчера „Тајмс“ објави дека Велика Британија формално ќе признае палестинска држава овој викенд.
Стармер во јули предупреди дека Велика Британија би можела да ја признае Палестина ако Израел не преземе чекори за ублажување на страдањата во Газа и не постигне прекин на огнот во речиси двегодишната војна со Хамас.
„Тајмс“ објави, без да наведува извори, дека Велика Британија ќе издаде соопштение откако американскиот претседател ќе ја заврши својата посета на Велика Британија.