Крајнодесничарските коалициски партнери на израелскиот премиер Бенјамин Нетанјаху и претставниците на доселениците бараат од владините лидери да го анектираат Западниот Брег и да ја продолжат војната во Газа, со цел да се обезбеди целосен пораз на Хамас, објави ДПА во неделата, повикувајќи се на весникот „Тајмс оф Израел“.
Трамп неодамна изјави дека нема да дозволи анексија на Западниот Брег. Палестинците се надеваат дека областа ќе стане дел од нивната идна држава.
Се очекува Трамп утре на средба, да му презентира на Нетанјаху план од 21 точка за прекин на војната во Појасот Газа, објави „Тајмс оф Израел“.
Планот наводно вклучува итно ослободување на израелските заложници што ги држи Хамас во Газа, од кои се верува дека 48 се живи, во замена за ослободување на неколку стотици Палестинци од израелските затвори и повлекување на израелската армија од енклавата.
Според планот, Хамас нема да има никаква улога во Појасот Газа, а на Израел нема да му биде дозволено да го анектира Западниот Брег. Ќе се воспостави преодна влада на палестинските територии.
Според извештаите, како резултат на преговорите посредувани од САД, се предлага пат кон палестинска држава, но Нетанјаху и натаму е силно против ова.
Министерот за национална безбедност од крајната десница, Итамар Бен-Гвир, напиша во објава на X дека Нетанјаху нема мандат да ја заврши војната без апсолутна победа над Хамас.