Прашање кое граѓание често знаат да си ги постават. Колку заработија домашните банки од провизии и надоместоци?! Порталот „Фактор“ направи споредба на заработените профитни маржи од надоместоците за провизии и платен промет на најголемите деловни банки кои котираат на берзата, анализирајќи ги резултатите од билансите на успех во првиот квартал од 2026 и првото трoмесечие од 2025. Во меѓувреме во текот на 2025 година, барем на хартија, имаше значително намалување на некои трошоци за банките за плаќањата кон СЕПА и МИПС.
Во јули 2025 година Народната банка донесе нов модел на тарифирање за банките. Наместо претходниот модел, воведени се поефиксни и попредвидливи надоместоци, со што се намалија трошоците што банките ги плаќаат кон НБРСМ за процесирање на плаќањата преку МИПС. По приклучувањето на Македонија кон СЕПА, дел од банките почнаа значително да ги намалуваат тарифите за евро-плаќања. Сепак ова се само дел од трошоците кои учествуваат како „расходи за провизии и надоместоци“ кај домашните банки во земјата.
НЛБ банка во првите три месеци од оваа година има зголемени приходи од надоместоци за платениот промет, но и зголемени расходи. Нето-добивката од провизиите за периодот 1 јануари – 31 март 2026 е 6.725.447 евра и поголема е за 0,7 милиони евра во однос на првиот квартал од 2025-та. Кај УНИ банка се зголемени и приходите и трошоците кај овој сегмент. Нето-заработката од овие услуги е намалена на 835.856 евра, односно за 100-тина илјади евра.
Комерцијална банка и Стопанска банка имаат зголемени приходи од овие надоместоци од една страна, а истовремено и намалени трошоци во овој сегмент. Комерцијална банка остварила нето-добивка од 6.257.715 евра во овој период. Позитивната разлика во однос на минатогодишниот период е 0,81 милиони евра. Стопанска банка има зголемена добивка за „провизии и надомести“ за 0,423 милиони евра и таа изнесува 3.605.139 евра.
Од анализата може да се заклучи дека за една година е зголемен процентот на профитна маржа за „надоместоци и провизии од платениот промет“ кај Стопанска банка, Комерцијална банка и НЛБ банка. Ако се споредат првите квартали од 2025 и 2026, кај НЛБ банка профитната маржа е зголемена од 65,55 на 66,83 отсто. Кај Комерцијална банка таа е зголемена од 60,42 на 66,51 процент. Исто и кај Стопанска банка има зголемување од 50,18 на 56,25 отсто. Просечната профитна маржа кај четирите банки, заедно со таа на УНИ банка, е 56,2 проценти од приходот.
Овие надоместоци се втор најголем приход за комерцијалните банки, по наплатата на камати од пласираните кредити. Министерката за финансии, Гордана Димитриеска – Кочоска, прашана за можноста да се ограничат банкарските провизии, пред една недела рече дека „надоместоците не се дел од законска материја, ниту некогаш биле“.