Дали лидерите знаат колку треба да постигнат за да бидат дел од Шенген или заедничкиот пазар, вели еврокомесарката Марта Кос коментирајќи ја идејата на албанскиот премиер и на српскиот претседател. Таа изјави дека влегувањето на една земја во Шенген или во заедничкиот пазар на Европската Унија бара реформи исто толку тешки како и оние за полноправно членство во Унијата.
Во авторски текст за германскиот „ФАЗ“, Рама и Вучиќ претходно се пожалија на бавното темпо на интеграцијата, посочувајќи на внатрешни реформи, геополитички тензии и институционални ограничувања. Тие предложија нивните земји да бидат дел од единствениот пазар и Шенген зоната без да добијат политичко право и право на вето како полноправни членки.
Кос го отфрли овој предлог. Говорејќи на самитот „Конкурентна Европа“ на „Политико“, таа исто така оцени и дека стремежите на Украина за членство во ЕУ до 2027 година се „невозможни“, додека Исланд би можел да биде „посебен случај“ и побрзо да напредува доколку повторно ги отвори преговорите.
Еврокомесарката истакна дека Унијата треба да ги промени правилата за проширување и ги повика земјите членки да ги презентираат своите планови, откако беа отфрлени предлозите на Комисијата за обликување на процесот.